Наьсарен РДК «Дагахьа лоаттаду» яха цӏай-концерт хилар
Наьсарен кхален культуран Цӏагӏа Сийлахь-боккхача тӏема Коталон Ди гаргагӏорташ, «Дагахьа лоаттаду» яха цӏай-концерт делар. Цо цхьан сцена тӏа искусствай говзанчаш, республикан къона начӏалаш гулдир. Гӏалгӏайчен халкъа артиста Хулаганаькъан Артура дӏахьош яр дика вӏашагӏъелла кхетачен программа.
«Шоай программа кийчъяьяр Гӏалгӏайчен цӏихезача артисташа Кагермановгӏар Фатимас, Пхьугой Амира, иштта иллиалархой кружокашка ӏомалуш болча Беканаькъан Беллас, Баьтаранаькъан Хьавас, Йовлой Хьавас, Харсенаькъан Дейсе, Альховская Алисас, Бохтаранаькъан Аминас. Царна кулгал деш ва Хулаганаькъан Артур. Къаьстта белгалйоалаш яр «Мужече» яха халхара ансамбль, цун керте латт Гӏалгӏайчен культуран болхло Итазанаькъан Осман», - аьлар «Сердало» газетага Наьсарен РДК кулгалхочо Дзейтанаькъан Темарлана.
Моаршал хоаттача дешашца йистхилар гулбеннарашка Республикан халкъа кхоллама цӏен исбахьален кулгалхо, искусствай цӏихеза болхло Абдурзаканаькъан Аьсет, Наьсарен кхален депутатий совета кулгалхо Эккажанаькъан Идрис, кхален администраце вахара даькъа кулгалхо Саганаькъан Мадина.
Зале бар кхален администраце болхлой, депутаташ, тайп-тайпарча урхаллений кулгалхой, моттигера бахархой, иштта Эккажкъонгий-Юртарча №1 йолча юкъерча ишкола, №3 йолча юкъерча ишкола дешархой, царна чӏоагӏа лоархӏаме хилар из концерт.
