«Кинон бийса» яхача боламга гӏолла, цӏихеза комеди гойтар Наьсарерча РДК
Маьцхали бетта 29-ча дийнахьа, ерригача Россе «Кинон бийса» яха хӏара шерара болам хилар. Даьхен кинематограф дег чура езарашта йийлла яр кинотеатрай, концертни залий, культуран Цӏеной наӏараш. Хӏаьта Наьсарен кхале из цӏай кхален Культуран Цӏагӏа дездир. Болам хьаллоацаш, 1968-ча шера режиссёра Гайдай Леонида даьккха «Бриллиантий кулг» яха цӏихеза советски комеди гойтар цига.
«Йоккхача экрана тӏа советски кинон цӏихеза хиннача актёрий балхага хьажа аьттув хилар мехкахой. Ший вахара денош миско дӏахьош хиннача Горбунков Семёнаца нийсденна истори, зуламхой гучабахар итташ шерашка вӏалла кӏордадеш дац кино дезарашта. Массанена, дукха шераш хьалха денз, советски кино безабенна цӏихеза актёраш Никулин Юрий, Миронов Андрей, Папанов Анатолий, иштта кхыбараш ба цу тӏа къахьийгараш», - дийцар «Сердалога» РДК кулгал деча Дзейтанаькъан Темарлана.
«Бриллиантий кулг» яха кино наха дезаденна итташ шераш да. Боккхийчарна а тахан кхийначарна а хьамсара дола кино хинна дӏаэттад из. Цу кинон чура цхьаццадола къамаьлаш, моцагӏа денз наха дезаденна, вахаре чӏоагӏденна, шоайла дӏа-хьа дувцаш да тахан а.
Культуран цӏагӏара хьаьший, чӏоагӏа дог айденна болаш, дӏаухаш бар. Иштта дола кино, мел дукха шераш даларах, наха хийрадоалаш ца хулилга белгалдора цхьабараша. «Кинон бийса» яхача боламо цӏаькха а хьагойтар массанена, кӏоарга маӏан долаш вӏашагӏделлача кинос наха боккха салоӏам белга, дукха хӏама дагадохийтилга.
