Гӏажарий-Юртарча культуран цӏагӏа, «Ислам наркоманена, терроризма духьала» яха кхетаче дӏайихьар
Гӏажарий-Юртарча культуран цӏагӏа моттигерча ишкола дешархошца кхетаче хилар, из хетаяь яр вай заман зуламашта духьалъоттара. Цига дийца керттера дош дар наркоманена, терроризма духьала къовсам лоаттабу хьехамаш дар.
«Берашта хьалхадаьккхар, бусалба дино сага цӏий ӏомохкадар, саг вер цхьаккха а оагӏорахьара могадеш цахилар; моллагӏча къамах из саг хиларах, Аллахӏа хьалхашка беррига нах цаӏаш хилар. 15 бӏаь шу хьалха (Даьлера салам-моаршал хилда цун) Мухьаммад Пайхамара хьалхашка десса ӏадаташ да моллагӏа дола ийрча гӏулакхаш леладара духьала. Ислам-из машаре ди ба, цо тӏахьех лоалахошца барта волаш, кхыча къаман нах лоархӏаш вахара. Бусалба сага доагӏаш дац довне хилар. Моллагӏа бола цатоам дикача оагӏорахьа къоастабе беза, хоза гӏулакх гойташ, кӏаьда къамаьл долаш», - аьлар «Сердало» газетага из кхетаче вӏашагӏъеллараша.
Дешархошта хьалхашка къамаьл деш хилар наха юкъе дика лоархӏаш бола хьехамчаш. Культуран цӏен кулгалхочо, МВД ветераний Совета доакъашхочо Йовлой Ювсапа кхайкарал дир берашка, лоралуш хилара уж тӏахьехаш.
Юрта администраце кулгалхочо Чахкенаькъан Османа, ше къамаьл деш, белгалйир хӏаравар бехктокхаме хилара оагӏув. Цо хьалхадаьккхар берашта, кхерамзлен, эхь-эздела доакъошца лоадам боацараш цахилар, кхыметтел зӏамига ца зувш дита кхоачамбоацар а кхоана духьалдала тарлуш да.
Цига дакъа лоацаш вар бокъонаш лораеча болхлой викал - полице лейтенант Бохтаранаькъан И. Цо а дийцар хӏаране бехктокхам лакха хила безарах, кагирхошта закон довзийташ дола масалаш доаладир.
Цу тайпара кхетаченаш дӏахьош хиларо новкъостал ду кхувш йоагӏача тӏехьенна нийсача наькъ тӏа хила, лерттӏа мехка саг хила - из ба хӏама кхоллара, машара, гонахьара нах безаш хилара никъ.
