Россех Гӏалгӏайче дӏакхийтта 256 шу дизара хетабаь болам дӏабихьар Гӏажарий-Юрта
Вай къам боккхача мехках Россех дӏакхийтта 256 шу дизара хетабаь Даьхенцара безам чӏоагӏбарах бола болам дӏахьош хилар, Гӏажарий-Юртарча № 3 йолча ишколе. Вай къонача тӏехьенна цу лоархӏамеча хӏаман истори довзийтара тӏехьа дӏахьош бар болам. Берашта хьалхадаьккхар къаман, мехка истори довза, лархӏа дезилга, Даьла къахетамца нийсденнача дикай массахана хам бе безилга.
«Сердалога» из хоам бера цу оагӏонцарча министерствера. «Истореца лоархӏаме бола из гӏа баьккхар 1770-ча шера. Россе паччахьалкхенца цхьанкхетар къоабалдир вай мехко. Вайна а хӏама тоадалара тӏехьа, кердача наькъ тӏа баьккха гӏа беркате хулаш, боккха лоархӏам болаш хилар из бартчӏоагӏо.
Кхувш латтача къонача тӏехьенга дийцар цу исторех, тахан мехка хӏара денна хулаш долча дикача хувцамех хам беш хила езилга. Къаман культура, истори, даьшкара хьадена беркате ӏадаташ лорадеш ваха веза саг, ший Даьхенах дог лазаш, цунца лерхӏам болаш хилар хӏаране декхар да», - дийцар тха газетага.
Дешархой шоай овла дика бовзаш бар. Дега тоам беш да къонабараш къаман истори тахка ловш хилар. Гӏажарий-Юртарча № 3 йолча ишколе боаржабаьча боламо хьагойтар, гӏалгӏай къаман низ хилар - из шоай даьша даь дикаш диц ца деш, сийрда кхоане кхоллара тӏехьа хьинаре къахьегаш; нийсача, беркатеча хӏаман тӏехьа хилар долга.
