Дабе-Юртара керттера никъ тоабеш латт
Гӏалгӏайчен Магӏалбика кхален Дабе-Юрта дӏахо дӏахьош ба Кооперативни урам тоабара болх. Из дӏахьош ба «Шахьара дика хьалаш» яхача федеральни проекта чубоагӏаш.
«Из доазув тоадар дувзаденна да моттигерча наха шоаш из хержа хиларца, ерригроссийски онлайн-кхадж тоссаш, цига Кооперативни урама тӏехьа дукхача наха шоай оаз дӏаелар», - аьлар «Сердало» газетага Магӏалбика кхален администраце.
Цу урама керттера белгало - из ба моттигерча ишкола юхе. Хӏара денна цу наькъ тӏагӏолла юкъарча дешара ишколе дӏаух бераш деша, цудухьа из лоархӏаме а хилар.
Ахка юкъекхоачаш, укхазара балхаш йистедаха хьожаргба. Магӏалбика кхален даькъ тӏа из 17-гӏа доазув да къаман проекта чудоагӏаш тоадеш.
«Хӏанз укх сахьате а онлайн-кхадж тассара болх ба дӏахьош, доазонаш хьахоржаш - уж да 2027 шера тоаде лерхӏараш», - аьлар тхога хоам баьчо. Магӏалбике тоаде дезача доазонашта юкъе ба Йоккхача Ачалкхен Горни урам, Юкъерча Ачалкхера Нефтяникова урам. Онлайн кхадж тасса йиш я, цӏагӏара ара а ца воалаш. Эшаш хилча волонтёраша а новкъостал дергда юкъарлон моттигашка.
«Шахьара дика хьалаш» яхача проекто къаьгга хьагойт, Магӏалбика кхален нах бахача юрташкара хьал тоадар царех шоаех тийша хилар. Кооперативни урам цунна дола тешал да.
