Даби-Юртара Кооперативни урам тоабир моттигерча рузкъах
Даби-Юртара никъ тоабеш хилар болхлой. 750 метрага кхоачаш болча Кооперативни оалача урама наькъ тӏа асфальт ӏобиллар цар. Моттига ганзах дӏахьош бар из лоархӏаме болх.
«Юртахошта лоархӏаме ба из никъ, ишкола тӏабодаш хиларах. Машинашта, гӏаш леларашта паргӏато еш, кхераме боацаш хургба тахан куц хийца урам. Хьалхагӏа федеральни программага гӏолла гӏашлой никъ буллаш, лампаш йогӏаш хувцамаш даьдар цу моттиге. Цхьа бутт баьлча цу накъ тӏагӏолла ишколе аха долалургдолча берашта доккха совгӏат хиннад ала йиш я цох», - дийцар «Сердалога» Магӏалбика кхален администраце.
Белгалде деза, кхален юрташкарча наькъий хьал ше-ший аргӏагӏа меттадоаладеш латтилга. Мехкара наькъаш паргӏата, наха кхераме доацаш, боаггӏача боараме меттадоаладаь хилар, лоархӏамеча декхарех да тахан.
