Кердача Реданте цӏихеза байтанча Гаьгенаькъан Гирихан дагалаьцар
«Дешархошта лаьрхӏа культура» яхача ерригача Россе проектага гӏолла, цӏихеза байтанча хинна Гаьгенаькъан Гирихан дагалаьцар Кердача Реданте. Къонача тӏехьен воккхача говзанча кхоллама никъ бовзийтар цига. «Кхетаче дӏахьош хиннача Хамхой А. берашта дийцар Гаьгенаькъан Гирихана байташ къаман литературе лоархӏаме моттиг дӏалаьца латтилгах. Хьинарах бизза хиннаб цун кхоллама никъ. Гаьгенаькъан Гирихан вайх хӏаране дегашка ший тайпара моттиг дӏалаьца ва, дог сомадоаккхаш йола байташ дукха я цун гуллама юкъе. Советски, российски байтанча, драматург, таржамхо волаш ваьха Гирихан вай мехка санна арахьа а дикка вовзаш вар.
2015-ча шера 71 шу долаш хаьдар цун вахара никъ. Дуккхача наьха дегашка сийрда, хоза лар йита саг ва из»,- дийцар «Сердалога» культуран Цӏен болхлочо Хоаной Марета. Гаьгенаькъан Гирихан чӏоагӏа кӏаьда оамал йолаш, цхьа ший тайпара дика дог долаш саг вар. Цун байташ, фаьлгаш ишколашкарча книжкашта юкъе да. Нохчий, балкхарой, венгрий, киргизий, украинций, селий меттала таржамаш даьд цун балхашта. «Дунен саг» яха цӏи луш белгалвир из 2002-ча шера.
Культуран Цӏагӏа хьокха оттадаьдар цун книжкаш. Цун гулламашка хьежача гуш дар из мел доккха начӏал ший дегӏаца долаш хиннав. Къаман вахаре, литературе массахана яхьаргья Даьхе езаш, ший къамах доаккхал деш, дуккха дикаш доаржаде ловш ваьхача доккхача деша говзанча цӏи!
