Кердача Реданте кӏайча ӏаса Денна хетаяь камоаршала Урок хилар
Кердача Реданте дӏайихьар камоаршала Урок, из хетаяь яр Халкъашта юкъерча кӏайча ӏаса денна. Дерригача дунен тӏа из ди хетадаь да, бӏаргса дайнараш хьаллацара. Кӏай ӏаса «бӏаргий» керттера белгало я.
«Берашта из хьал довзийтара, цар къахетам совбаккхара оаха интерактивни дщешар дӏадихьар №5 йолча юкъерча ишкола дешархошца, исбахьален самодеятельноста болх ӏомаберашта. Урок дӏахьош, довзийтар из ди хьакхоллара бахьан, иштта дуненна кхыча оагӏорахьара бӏарахьажар а хилар цар, царна дайзар къахетамца керттердар. Ловзара кепе, доакъашхоша бӏаргаш дувшадаь, цхьацца долча хаттарашта жоп делар, уж хьожаш хилар шоашта цхьацца йола хӏама корайоагӏий е кулг тохарах из шоашта йовзий. Цо берашта кхетаде таро елар, малагӏа халонаш хьалха нийслу бӏаргашта хӏама ца гуш болча наха», - аьлар «Сердало» газетага Кердача Реданта культуран Цӏен кулгалхочо Хоаной Марета.
Камоаршала Урок дӏахьош дакъа лоацаш мел хинначо кхетадир цун маӏан. Шоайла хьаллоацаш, терко еш, эшача накъаводаш хиларо вай дуне хӏара сага дикагӏа, хозагӏа ду.
