Кердача дешара шера, 8,5 эзар совгӏа хьалхарча класса дешархой тӏаэцаргба вай ишколаша
8,5 эзар совгӏа хьалхарча классе болха дешархой тӏаэца кийчо еш ба вай ишколашка тахан. Хӏара шерца дукхагӏа хулаш латтача дешархошта лаьрхӏа керда ишколаш хьалъеш, боккха болх ба мехка дӏахьош. Укх тӏехьарча ялх шера 49 керда ишкол хьалъяьй республике. Таханарча дийнахьа мехка болх беш 160 ишкол я, царех 109 ишкол бераша цхьан сменах дешаш я.
Дешархой дукхагӏа хилар теркалдеш, тӏатеӏӏа дӏахьош болх ба из. Ишколаш тоъаш йоацача юрташта къаьстта терко еш, ма хулла цу оагӏонца дувзаденнараш аттача даха гӏерташ, таханарча хано дӏадеххача тайпара йола беркате ишколаш я хьалъеш латтараш.
«Бераша шин сменах дешаш хилара гӏулакх меттадоаладе хьожаш ба тахан республике. Къаьстта терко лоаттаю юрташта. Шахьаре бах е юрта бах аьнна доацаш, толашагӏа йолча ишколе дешаш хила деза хӏара бер. Цунга хьежжа юрташка хьаеллаш латт геттара дика тоаяь йола керда ишколаш. Чӏоагӏа лоархӏаме дакъа дӏалоацаш да цу балха юкъе РФ Президента Путин Владимира гӏо деш хилар. «Дешар» яхача къаман проектага, 2025-ча шера юкъеяьккхача «Кагирхойи бераши» яхача къаман проектага гӏолла; доккхий хувцамаш де аьттув баьннаб мехка. Хӏаьта вай республиканна къаьстта лоархӏаме да, иштта оагӏув хьаллоацаш хилар», - язду ший Телеграм-оагӏон тӏа мехкадас Келаматанаькъан Махьмуд-Ӏаьлас.
Республикан кулгалхочо иштта теркалдир хӏара шера мехкара ишколаш тоаеш, спортзалаш хьаеллаш, берашта паргӏато хилийтара тӏехьа ма хулла къахьегаш болга. Лертӏача, боаггӏача боараме тоаяь йолча ишколе дешаш хила деза хӏара бер! Цу оагӏонца тахан къахьегар, кхоанен хӏама тоадар да. Дешара хьал тоадарал совгӏа, шоай начӏал доаржаде, спортаца, кхолламца къахьегача наькъ тӏа толамаш даха, кхоана шоашта накъадаргдола гӏулакх хьахаржа гӏо ду берашта. 2030-ча шера ерригача ишколашка цхьан сменах дешаш хила беза, аьнна, соцам баьб РФ Президента Путин Владимира. Из кхоачашдара тӏехьа болх дӏахьош ба хӏара денна.
