Оалкама юхе ширача заман боарзаш дола моттиг гучаяьннай
24.03.2026 14:52
Лоаман ГӏалгӀайчен Эса-ЧӀоже археологически тохкамаш деча хана гучадаьлар доккха, цхьана нах дӀабехка хинна боарзаш, уж да борза (бронза) ханашкара, яхаш, дийцар «Сердало» газетага тохкамаш деча доакъа лоацараша.
«Тамашийна моттигаш кораяьй Е.И. Крупнова цӀерагӀча Археологе центра болхлочунна Гаданаькъан Умалата Оалкама йисте. Цу боарзий кеп тара я вай зама тӀаяле ӏӏ эзар шу хьалха хиннарашта. Цхьацца йола моттигаш доккхий боарамаш долаш я. Историкаша лоархӀ, лоаман кӀоаргаленашка цу тайпара нах дӏабохкаш хинна моттигаш кораяр, из тамашийна гӀулакх да», - аьлар хоамо.
Гаданаькъан Умалата яхачох, уж кашамаш дувзаденна да Гӏажарий-Юртарча даькъ тӀа бахаш хиннача нахаца.
