Догӏан хиво кӏалйитача юрта, Селий мехкара новкъостал дера
Гӏалгӏайчен Шолжа кхален Эбарга-Юрта Селий мехкара гуманитарни новкъостал дера, дукха ха йоацаш хий чудаьнна зе хиннача дезалашта лаьрхӏа. Из новкъостал вӏашагӏделлар Хасавюрта кхален кулгалхочун Мамаев Бахьаудина хьалхадаккхарах, яхаш, дийцар «Сердало» газетага Гӏалгӏайчен Паччахьалкхено.
Моттигера бахархой хьаллаца Хасавюрта вӏашагӏтехар гуманитарни новкъостал. Цунна чудоагӏаш дар кхачан даараш: устагӏан дулх, молаш дола хий, хьоар, иштта этта чоалхане хьал юстардоаккхаш эшаш бола технически гӏирс, тӏабувхабу гӏирс: белаш, гӏишлон материалаш, иккаш, калошкаш, мотопомпаш, генератораш.
Гӏалгӏайчен наха баркал оал вошал долча Селий мехка бахархошта, цу халача хана уж новкъостал де бахкарах.
Карарча хана, Эбарга-Юрта балхаш дӏахо дӏахьош да. Укхаза иштта хоам бу нахага вахара, эшача хӏаман новкъостал сенца де йиш я.
