Гӏалгӏайчен ФСБ доазув лорадерий урхаллене бӏухой белгалбир
Гӏалгӏай Республике гӏолла йолча Россе кхерамзлен Федеральни мотиге белгалбир амал дӏахьош бола бӏухой.
«Из дагалоаттама кхетаче цхьан лоархӏамеча хьалагара кхычунга йоалаш дӏахьош яр. Лаьрххӏа гулбелар цига доазув лорадерий викалаш - цар сий дир хӏанз амал даь баьнна цӏагӏа совцаргболча болхлой, белгалдир цар юкъара гӏулакх дӏалоацаш, доккха дакъа юкъедена хилар. Цар шоай балха тӏехьа денал гойтарах, толамаш дахарах совгӏаташ, сийлен грамоташ елар царна. Цу лоархӏамеча дийнахьа эпсараша кхайкарал дир салташка накъабоахаш долча дешашца, цар белгалдир, Даьхен бӏухой яха цӏи царца даим юсаш хилар.
Юххера а, берригача доакъашхоша цхьана сурт даьккхар», - аьлар ГӏР гӏолла йолча ФСБ доазув лорадерий урхаллене. Кхетаче дӏахьош совгӏаташ делар паччахьалкхен кхерамзле лораяра шийгара дакъа юкъеденарашта, иштта профессиональни кердадараш дика ӏомадаьча болхлошта.
Баркал аьлар салташта шоай тӏема декхар дика кхоачашдеш хиларах, Даьхен мутӏахьа болаш, шоай балха декхар цар дизза кхоачашдарах.
«Амал даь валар хӏара бӏухочун вахаре лоархӏаме оагӏув я. Кхетаче дӏахьош белгалдир сихача амала ха чакхъяьнна хилар а, салтечун гӏулакха боахамои юкъарлонои лакха мах оттабеш хилар а. Амал деча даькъ тӏа ӏомадаьр кагирхошта вахаре накъадоалаш да», - аьлар тхога хоам баьчо.
