Гӏалгӏайчен массазарча Москверча викала дийцар, федеральни проекташта кагирхой юкъеозарах
Гӏалгӏайчен Москверча массазарча викала Оздой Муслима кхетаче дӏайихьар, цига дакъа лоацаш хилар Ямало-Ненецки автономни куран, иштта Россе кердача регионашкарча массазарча викалий балха новкъостий: Гӏазгиренаькъан Сайт-Мухьмад, Фаьрганаькъан Тӏахӏир, иштта Паччахьалкхен Думан Совета, кагирхой политикан, берий кхерамзлен кулгалхочун гӏонча Лаьнанаькъан Луиза.
«Доакъашхоша дийцар Гӏалгӏайчен кагирхой, федеральни а моттигера а проекташ оттаеш, шоайла бувзам лелабе таро йолаш хиларах. Цига могадир, Россе кагирхой кхетаченашка, цу юкъе ерригроссийски, кураш тӏара майдаш а йолаш, республикан кагирхоша дукхагӏа дакъа лацар, цига таро хургья шоай проекташ гойта, шоай гранташ хьаллацийта. Иштта дийцар Сибре, Къилбаседе, Гаьнарча Малхбоале даим даьхача, дахача зӏамигача къамий кагирхой кхетаченашка дакъа лоацаш хилийта безарах. Къаьстта цига белгалдир ЛНР, ДНР. Херсонски, Запорожски областашка бахача къонача наха, цу тайпара кхетаченаш дӏахьоча хана, дакъа лацар лоархӏаме долга», - аьлар «Сердало» газетага викала фусаме.
Балха чаккхе еш, керттера лаьрхӏар пайда луш йола проекташ оттаяра кагирхой юкъебахар, уж чакхъяхара кхетаченашка дакъа лацар да. Из деррига вай кагирхой федеральни программашка, мехкашта юкъерча гӏулакхашка дакъа лоацаш хилийтара деш да. Царна хьалхашка хьаелл керда таронаш.
