Къамашта юкъерча машарца дувзаденнарех дийцар мехкарча Паччахьалкхене
Мехкарча Паччахьалкхене дӏайихьача лоархӏамеча кхетаче дакъа лоацаш хилар Къулбехьерча тӏема оагӏон доакъашхой, мехкара хьакимаш, боккхагӏбарий Кхела, къаман культуран оагӏон доакъашхой. Мехкара Миннац яр из кхетаче вӏашагӏъеллар. Кхетаче гулбеннараша дийцар тайп-тайпарча къамашта юкъе машар, бувзам лоаттабарах, хӏара къаман ӏадаташца лерхӏам хиларах, кхувш латтача къонача тӏехьен Даьхенцара безам чӏоагӏбеш болх лоаттабарах.
«Федеральни партийни проекта «Цаӏ йолча Россе кхалнаьха болама» республикерча оагӏон доакъашхо йолча, Россе къамий Ассамблея мехкарча даькъа хьалха латтача Бӏархой Мадинас, шийна хетар белгалдеш, къамаьл дир цига. Россе дахаш долча къамашта юкъе барт, цхьоагӏо хилар; къона тӏехье ший истори, ӏадаташ, Даьхе езар лоархӏаме долга хьалхадоахаш ураоттаяр керттерча гӏулакхех долга теркалдир цо», - йоах тахан «Сердалога» «Цаӏ йолча Россе» моттигерча даькъера бенача хоамо.
«Цаӏ йолча Россе кхалнаьха болам» яхача проектага гӏолла; тахан дӏахьор боккха, лоархӏаме болх ба. Наха юкъера ший моттиг лораеш, дезала юкъе чӏоагӏденна латта беркате дола ӏадаташ лоархӏаш, регионерча массаболча наха юкъе барт, цхьоагӏо хургйола гӏулакхаш доаржадеш, хила дезилга белгалдеш моттиг я из. Цхьана къахьегаш, мехка беркате хургйолча проекташка гӏолла дикача хувцамашка кхача безилга теркалдир гулбеннараша. Болх цхьана дӏахьош хиларо дикагӏа аьттув боаккхаргба цу дерригача гӏулакхашка гӏолла толамга кхача.
