Гӏалгӏайчен паччахьалкхене дийцар, къаман проекташ кхоачашъярах
Гӏалгӏайчен паччахьалкхене дӏайихьача кхетаче лаьтта керттера дош дар, къаман проекташ кхоачашъяр. Сластенин Владимира кулгал а деш, дӏайихьача кхетаче дийцар 2026 шера уж кхоачашъе хьожадаьча ахчан хьокхамаш. Бӏарчча хьаийцача 5,8 млрд сом да из, цун керттера дакъа (5 млрд сом гаргга) федеральни бюджетера да, юхедиса 0,8 млрд сом моттигерча казанчо ӏалашдаьд. Карарча хана контракт оттаяьй 86%, кассе гӏолла арадаьннад кӏимарса бутт юкъекхоачаш 14%.
«Россе Минфина яхачох, «Вахара хьалаш», «Экологи» яха къаман проекташ кхоачашъеш, кассе гӏолла кхоачашдаьр дукхагӏа да, федеральни хьокхамашца нийсдича. Дӏахо дӏахьош да 12 къаман проекте дакъа лацар, цо чулоац вахара политика, кагирхой оагӏув, экономика, таьрахьашка даккхара хьал, экологи, туризм, юкъара хьал дегӏадоаладар. Карарча шера вахара хьалашца, дешарца, транспортаца, коммунальни даькъца из болх дӏахьоргба. Цунна чудоагӏа дукхача дезалашта новкъостал дар, Сурхо тӏа вахара гӏулакх лоаттаду Цӏа хьалдар, 20 гаргга автобус эцар, никъ тоабар.
Дешара даькъ тӏа лаьрхӏад цӏенхашта тоадара балхаш де ӏарпенаькъан цӏерагӏча колледже; Кердача Реданте, Пхьилекъонгий-Юрта, Гӏажарий-Юрта, Галашка ишколаш хьалъе. Иштта де дезарашта чудоагӏа Наьсарера ӏам тоабар; 24 юкъара моттиг тоаяр; коммунальни даькъ тӏара хьалаш кердадахар; культуран, деша даха ха йоацача берий, юкъарча дешара гӏишлош тоаяр», - аьлар Гӏалгӏайчен паччахьалкхене «Сердало» газетага.
Къаман проекташ сага вахара хьалаш тоадара чуйоагӏаш я, цар къоастаду Гӏалгӏайчен экономически хургдар дегӏадоаладар. Уж ерригаш а цхьана кхоачашъе езаш я.
