Керда дешара шу дӏадоладе ишколаш кийча хилара, тешал дир паччахьалкхено
Россе Паччахьалкхен кулгалхочун гӏонча волча Чернышенко Дмитре кулгал деш дӏайихьача видеокхетаче, керда дешара шу дӏадоладе вай мохк кийча хилар белгалдир премьер-министр волча Сластенин Владимира.
«Дешара шу дӏадоладе кийча я мехка 244 дешара моттиг: 154 ишкол, 84 берий беш, 6 юкъера дешара моттиг. 85 эзар совгӏа дешархой ба тов бетта 1-ча дийнахьа классашка шоай моттигаш дӏалоацаргьяраш, хӏаьта царна юкъера 8,5 эзар бераш хьалхарча классе долхаш да. СПО программага гӏолла дешар дӏадоладергда 6 эзар совгӏа студента. Мехкарча ялх дешара моттиге доккхий хувцамаш деш болх ба дӏахьош – ишкол, йиъ берий беш, колледж тоаеш боахк болхлой. Дешара шу долалуча дийнахьа чакхдаьнна хила дезаш да деррига балхаш», - дийцар «Сердалога» мехкарча паччахьалкхено.
Иштта лоархӏаме моттиг дӏалоацаш да дешара моттигий кхерамзлен хьалаца дувзаденнарашта йоккха терко яр. Цӏи яларах, иштта терроризмах мехкара ишколаш, берий бешамаш, колледжаш лораяра болх дикка чӏоагӏбеш ба мехка. Массайолча моттигашка камераш йохкаш, хоам беш долча гӏирсашта, иштта кхыдарашта терко еш ба республике. Цул совгӏа, цӏаьхха, моллагӏа хатар нийсденна хӏама хуле, эггара хьалхарча оагӏонца фу де деза хьалхадоаккхаш болх ба МЧС дӏахьош.
Премьер-министра белгалдечох, из беррига болх мехкарча хьакимаша тӏахьожам беш дӏахьош ба.
