Дола-Коа белгалдир Халкъашта юкъера кагирхой барта ди
Дола-Коарча культуран Цӏагӏа дӏайихьар «Кагирхоша дуне хувц» яха тематически кхетаче. Из ди - цхьоагӏон белгало, хьинар, кагирхой юкъара хургдар хьакхолла гӏертара хетадаь дар.
«Кхетаче дӏахьош хиннача Бохтаранаькъан Иманас доакъашхошта довзийтар цӏайна ӏадаташ. Цо дийцар мел лоархӏаме да тахан машара тӏехьа беррига кагирхой вӏашагӏкхетар, культуран бувзам лелабар. Кхетаче дӏайихьар шоайла къамаьл деш, цига иштта кхоачашде деза хаттараш а белгалдаьхар.
Дукхагӏа дийца дош дар тахан кагирхошта дагадоаллар фуд, професси харжар, граждански оагӏув лацар, иштта культуран кхетам балара хаттараш. Доакъашхоша дийцар шоашта хетар, кагирхой малагӏа дакъа дӏалоацаш хила беза таханара вахара никъ нийса лелабара тӏехьа.
Кхетаче дукхагӏа хетаяь яр кхувш йоагӏа тӏехье граждански оагӏув лоацаш; цхьана, барт болаш хилара тӏахьехаш. Из болх вӏашагӏбеллараш тешаш ба, цу тайпара кхетаченаш дӏахьош хиларо берашта новкъостал ду дуне дикагӏа деча гӏулакха шоашкара дакъа юкъедахьа.
