Кхааш ийдара духьалара кхетаче дӏайихьар, Дола-Коарча культуран Цӏагӏа
Кхааш ийдара духьалара кхетаче дӏаяхьа гулбелар Дола-Коарча культуран Цӏагӏа. Цига дийцар цу оагӏонца дувзаденнача керттерчарех, мехкарча экономиканна духьале еш уж хиларах, иштта къонача тӏехьенна хьалхадаьккхар кхааш ийдара духьала къовсам лоаттабе, цу хӏаман никъ хоадабе безилга.
«Ловзарга гӏолла дӏабихьар болх, бераша цу оагӏонца дувзаденнараш дикагӏа кхетадергдолаш. «Кхаъ балар» яха сценка оттайир доакъашхоша, цунга гӏолла берашта бӏаргадайра бокъо толхае мел атта да, хӏаьта цу гӏулакхах беш бола бекхам мел чӏоагӏа ба.
Кхааш ийдара оагӏонца кӏалгӏолла леладеча гӏулакхех дийцар къонабарашка, цар из хӏама ма дарра кхетадергдолаш», - аьлар «Сердалога» культуран Цӏен кулгал деча Алерой Билала. Кхетачен керттера декхар дар ураотташ латтача къонабарашта кхааш ийдар мел бӏеха, во, хьарам лаьрхӏа гӏулакх да дӏагойтар.
Ӏаьдала болхлоша санна, хӏара сага духьале е езаш, цу хӏаман «бӏы» бохабе безаш во да из. Вайга массанега кхоачаш дола юкъара гӏулакх да кхааш ийдара дхьала къовсам лоаттабар.
