Терроризм яхача зулама юкъе, вахар хаьдараш дагалаьцар Дола-Коарча культуран Цӏагӏа
Маьцхали бетта 21-ча дийнахьа, терроризм яхача зулама духьалара Халкъашта юкъера ди да. ООН Керттерча Ассамблейс , 2017-ча шера соцам баь, къоастадаь ди да из. Цу дено вай дегашта дагадохийт терроризм яхар мел бӏеха, доккха, унзара зулам да. «Террора цхьаккха къам дац» яха кхетаче дӏаяхьа гулбелар Дола-Коарча культуран Цӏагӏа.
«Цу кхетачен керттера декхар кхувш латтача тӏехьенна из зулам леладерий цхьаккха къам доацилга, цар дегӏаца адамалах хӏама доацилга дӏахайтар дар. Таханарча исторе хиннача цу оагӏонцарча доккхача хатарех дийцар кхетаче, цу юкъе дар Берса-Юрта этта унзара хӏама. Цу бӏехача наькъ тӏа ваьннар ший ираз доадаь, вахар дехка саг волга белгалдир къонабарашца къамаьл деш»,- йоах «Сердалога» бенача хоамо.
Къонача тӏехьенна хьалхадаьккхар цу зуламах лораялар, духьале еш хилар мишта хила деза. Кхетаче дӏахьош хиннараша теркалдир, терроризма хьалхалаттараша эггара дукхагӏа тувлабераш ӏехабераш къонабараш, хӏетта кхийнараш болга, цунга хьежжа интернета оагӏонашка къаьстта чӏоагӏа фийла болаш, тешаме доаца хӏама теркалдича ӏаьдалга хоам беш, хила безилгах аьлар.
Иштта йола кхетаченаш дӏакхахьар тахан чӏоагӏа лоархӏаме да, хӏана аьлча дунен хӏама довзанза болча къонабарашта пайда хул цох.
