Ленинграда го баьча хана гойта турпалал дийцар Дола-Коарча культуран Цӏагӏа
Мел ха дӏаяхарах, вӏалла а дицлургдоаца денош дукха да вай мехка исторе. Хӏара мехкахочун дег чу латта деза ла ма могга хала, ӏазапе хинна денош да ала деза царех. Тӏема шерашка Ленинградера наькъаш дӏакъовларах наха лайна хало, дерригача дунен гойта турпалал къаьстта лоархӏаме моттиг дӏалоацаш да вай боккхача мехка исторе. Дола-Коарча культуран Цӏагӏа цу деношта хетаяь кхетаче дӏаяхьа гулбелар нах».
Ленинграде баьхача наха цу унзарча шерашка гойтача турпалалах дийцар кхетаче. Нева яхача хи тӏа уллаш йолча шахьаре наькъаш дӏакъайла хиннача 872 дийнахьа эттача, дийца ца валлал доккха, унзара хиннача ӏазапах дийцар кхетаче дӏахьош хиннараша. Тӏеххьара низ ураувттабеш духьаллаьттад Ленинградера адам цу деношта», - дийцар «Сердалога» культуран Цӏен кулгалдеча Алерой Билала.
Дуненцара хаьдача санна хилар Ленинграда бахархошта уж денош. Шахьаре хьачувоалаш мел дола наькъаш дӏакъайла хиннад бӏехача фашиста, бакъда адам ца доха гӏерташ духьаллаьттад. Мах баь варгвоаца турпалал гойтарех ба уж. Моцал, ла ма могга йола шелал лаьтта денош да уж. Шахьаре ток яцар, ма даггара чуетташ бомбаш яр, хӏаьта а нах баха гӏерташ шоай мел дола денал ураувттадеш бар.
Заводашка къахьегаш, снарядаш арахецаш, гӏораяь латтача ишколашка дешаш, моастагӏчо лаьрхӏар парх аьнна дохаде хьожаш бахаш бар уж. Къаьстта терко еш дийцар кхетаче «йихка» лаьттача шахьарерча берех, кхалнахах, боккхача нахах. Фашиста наькъаш тедаш лаьттача салташта нийсса ураэттар уж, шоашта могачох воахаве гӏо дарах. Зӏамига маькха чӏегилг берригача дезала екъаш хиннача ноаной, цу бирсача деноша берал доадаьрий истори боккхача тӏема исторе дахаш да таханарча денга кхоачаш.
Цу хана лаьттача ӏазапах дувцаш йола Берггольц Ольгай, Ахматова Аннай байташ йийшар кхетаче бераша. Хӏара мугӏ дега ӏазап, унзарча деной узам, духьале яьрий турпалал чуэза бар. Из истори вай дегашка массахана даха дезарех да! Тӏехьа тӏабоагӏарашта довза деза малагӏча маьхаца Котало кхаьчай, фашист вохавар мишта хиннад. Дерригача дунен довзаш дола тӏема истори да из – цу унзарча шерашка Ленинграда наькъаш дӏакъовлар. Дийца варгвоаца турпалал да адамо, духьале еш, даха гӏерташ, гойтар. Фашиста хетар хиланзар Ленинградах!
