Керда МРТ аппарат оттаяьй РКБ
Дукха хьийжа, сатийса МРТ аппарат оттаяьй вай керттерча дарбанче. Дукха мах бола, дикагӀа лоархӀаш йола аппарат я оттаяьр. УнахцӀенон гӀулакхех йолча министерствон кулгал деча Ӏалбаканаькъан Зарас белгалдечох, республикан кулгалхоша, унахцӀенон гӀулакхех йолча страховане ганзо къахьегарах; дӀадахача шера тӀехьарча бетта хьакхаьчай МРТ аппарат.
2025-гӀа шу доладаларца, чакхбаьхаб цига унахой. Дукха хӀама чулоацаш, говза аппарат я оттаяьр. Тоннела шорал 70 см я, хьалха хиннача аппарата 60 см мара яцар.
Дозала низ 200 кийл ба, къаьнарча аппарата - 110. Геттара доккха дегӀ дола унахой дӀачухувшацар цу чу. 148 млн сом мах бола аппарат оттаеш, чура моттиг а дикка тоайир.
ИРКБ керттера лор йолча Коазой Луизас дийцачох, республикерча дарбанче хьакхача езаш кхы а хӀамаш я: операци еча лоаттаду истолаш, цу чу йоахкаю лампаш, видеоэндоскопически кӀалха увттаду гӀирсаш, иштта кхыдола гӀирсаш а. ХӀанз эггара керттердар - уж хӀамаш лораяр, боаггӀача боараме болх дӀабахьар.
