Соагӏапча хьадийллар Россе Турпалхочун Боканаькъан Мустафай пен тӏара сурт
Гӏалгӏайчен Магӏалбика кхален Соагӏапча, №30 йолча юкъерча ишкола пен тӏа го йиш йолаш да Россе Турпалхочун Боканаькъан Мустафай пен тӏа дилла сурт. Лаьрххӏа йола кхетаче дӏайихьар арт-моттиг хьаеллара хетаяь, цига бар дукха хьаьший, моттигера бахархой. Гӏалгӏайчен Кулгалхо Келаматанаькъан Махьмуд-Ӏаьла а вар дакъа лоацаш, республикан вахархочун лерхӏам бе вена. Республикан кулгалхочунца цхьана пен тӏара сурт хьадийллар Даькъасте гӏолла йолча Россе МВД Керттерча урхаллен кулгалхочо Бачурин Сергейс, Гӏалгӏайчен чурча гӏулакхий министра Котов Владимира. Иштта Даьхен бӏухочун лерхӏам бе баьхкар бокъонаш лораяра ӏаьдала болхлой, депутаташ, СВО ветеранаш, Магӏалбика кхален бахархой, Турпалхочун дезал, гаргара нах.
Пен тӏа диллача сурта тӏа Боканаькъан Мустафайца цхьана латт къона эскархо Ӏоахарганаькъан Рашид. Республикан Кулгалхочо яхачох, цу тайпара кеп хиларо таро лу Даьхен бахочох бола дагалоаттам лорабе, денала лоархӏам мел ба къонача ноахалашта хайта.
Боканаькъан Мустафас яьккхар Московски лакхара тӏема командни училище, из хилар бӏун командирагара, мотоиччархой батальона командирага кхаччалца. Цунна елар Денала орден, «Майрал», «Тӏема гӏулакх сий долаш дӏадахьарах» яха майдилгаш.
2023 шера маьцхали бетта 15-ча дийнахьа эпсар велар, тӏема декхар кхоачашдеш. Цо денал, майрал гойтарах цунна, венначул тӏехьагӏа, елар Российски Федераце Турпала яха цӏи. Цун цӏи лелаю №30 йолча, пен тӏа цун сурт даьча ишколо, иштта Гӏалгӏайчен «Къонача эскара болама моттигерча даькъо», - аьлар «Сердало» газетага Гӏалгӏайчен Паччахьалкхене.
Эггара чӏоагӏагӏа тӏаийцар Мустафай гаргарча наха даь къамаьл. Цун дас, фусам-нанас Азас хӏаранена баркал аьлар из дагалацарах. Турпалхочун дас кхайкарал дир дешархошка, царна нийса никъ хьалхабоаккхаш, цо дешархой тӏахьийхар шоай хьамсара мохк, юрт езаш хилара, бокъонца бола къонахий болаш хьалкхера. Доккха цӏай дар кхувш йоагӏача тӏехьен Гӏалгӏайчен Кулгалхочо, СКФО гӏолла йолча МВД ГУ кулгалхочо кхаь мехкагӏоначанна совгӏаташ далар - Боканаькъан Ибрахӏима, Фаьрганаькъан Ювсапа, Боканаькъан Ахьмада III-ча лерхӏама «Къонача эскархой сий» яха седкъий делар.
Пен тӏара cурт хьаделлаш вар Келаматанаькъан Махьмуд-Ӏаьла, Бачурин Сергей, Турпалхочун воӏ Боканаькъан Мухаммад, иштта къона эскархо Ӏоахарганаькъан Рашид. Цул тӏехьагӏа йист ца хула минот дӏайихьар.
