Гӏалгӏай турпала Йовлой Халида хетаяь яхьаш дӏайихьар Санкт-Петербурге
Балтийски флоте зӏамагӏа вола сержант волаш, декхараш кхоачашдеш хиннача эллиной-румий латарах йолча спорте белгала волаш хиннача, Денала орден яла оттаваьча Йовлой Хьусена Халида хетаяь дагалоаттама Кубок дӏайихьар, Ленинградски тӏема оагӏонца.
Гулбеннача дукхача хьаьшашта юкъе бар СЗФО Гӏалгӏайчен викалашцара нах. Мехкарча тайп-тайпарча моттигашкара спортсменаш бар яхьашка тӏагулбеннараш. Турпала цӏи дагалаьца, дӏайолайир цар яхьаш.
«Иштта йолча кхетаченаша вай къонача тӏехьенна гойт, Йовлой Халид санна Даьхен гӏулакха лаьттача къонгий цӏераш даиман боча йолаш яхаргйолга, саг яхь йолаш, денал долаш дӏачакхвала везилга», - белгалдир СЗФО вай викалаша.
Шолжа кхалера хиннача Йовлой Халида вахар лоаца хилар ( 1999-2022 шераш), бакъда, вовзаш мел хиннарий дегашка деналах визза воӏ волаш ваха висав из.
