Цхьан сменах дешаш хургда Инаркъера бераш
16.04.2024 09:55
Цхьан сменах латтача дешарца, дӀадоладергда Инаркъерча бераша керда дешара шу. Керда хьалъяь ишкол 540 бера лаьрхӀа я, цунга хьежжа аттачахьа дийрзар №12, №23 йолча ишколай хьал. Из хоам «Сердалога» бир Мехкадаь зарбан болх лелабераша.
«Таханара дешар - из вай берий кхоане я! Вай ерригача республикан хьал тоадалара тӀехьа доккха дакъа дӀалоацаш я къаьстта дешара моттиг. Керда хьалъяь ишкол таханарча хано дӀадеххача тайпара кийчъяь, берашта мел эшар Ӏалашдаь я», - белгалдир вай Мехкадас.
«Дешар» яхача беркатеча къаман проектага гӀолла дӀабихьа болх ба из.