В селе Сагопши продолжаются комплексные работы по благоустройству Соагӏапче тоаеш дола балхаш да юрта деш
03.08.2026 11:00
Соагӏапчен моттигий куц тоадара тӏехьа къахьегаш ба тахан Магӏалбика кхале. Карарча хана ши никъ тоабеш бола болх ба дӏаболабаь. ӏоахарганаькъан цӏерах болча урамера 650 метрага кхоачаш бола никъ, иштта Меданаькъан цӏи лелаю ах километр совгӏа дӏоахал дола никъ а тоабе лерхӏ.
Магӏалбика кхален администраце болхлоша «Сердалога» беча хоамах, бахархой хьал дикка аттача доаккхаргда уж никъ тоабаро. Иштта урамаш цӏендеш, гонахьарча доазон тӏа лостам беш болх а ба дӏахьош. 20 гектарага кхоачача моттигера лакха айенна латта буц дӏахьекхай. № 30 йолча ишкола юхера йоархӏаш дӏахьокхаш боахк.
Юртарча моттигий куц тоадеш бола болх цу тӏа соцаш бац, дӏахо кхы а дикка къахьега лаьрхӏа ба цига ЖКХ болхлой.
