Хий дӏаухаш дола ор мукъадоаккхаш, болх дӏабихьар Соагӏапча
Соагӏапча Ӏоахарганаькъан цӏерах болча, нах хӏетта баха хайшача ураме хий дӏаухаш дола ор мукъадоаккхаш болх дӏабихьар. Администрацена кулгал деча Аькхмарзанаькъан Ахьмада тӏахьожам беш, дӏабихьар из болх. Хий боаггӏача боараме дӏаухаргдолаш дӏахьош гӏулакх дар из.
«Ор чу дукха нувхаш, кхыйола хӏамаш хьаӏайна хиларах хий лертӏа дӏадодацар. Гонахьарча цӏеношта кхерам болаш гӏулакх хул цох, хий боаггӏача боараме дӏадодаш ца хилча, хӏана аьлча геттара хий хьаӏайна болх хуле, из тӏехдаха наьха коашка чудалар кхерам ба. Администраце белгалдир, иштта болча балха юрта тӏахьожам лоаттабелга. Ӏоахарганаькъан цӏерах болча ураме, иштта цу юхерча доазон тӏа бахача наха хьалхадаьккхар хий дӏаахийта даьккхача ор чу нувхаш, шоай коара совъяьнна хӏамаш чу ма тувса аьнна», - дийцар «Сердалога» Магӏалбика кхален администраце.
Моттигерча хьакимаша санна, бахархоша шоаш лораде дезаш хӏамаш да уж. Экологически оагӏонцара кхерамзлен хьал лорадар, шоаш бахача моттигашта лертӏа доал дар бахархой лоархӏаме декхар да.
