Даьла духьа дика де арабаьлар Эбарга-Юртара нах
03.10.2024 09:38
«100 дика гӀулакх» яха болам хьаллоацаш, 97 шу даьнна Алдагананаькъан Либихан йолча баха хилар Эбарга-Юртарча культуран цӀен, берий библиотекан болхлой. Из хоам «Сердалога» бир Шолжа кхален администрацера.
Ха яха саг лархӀар вай къаман юкъе массахана керте лаьттад. Цхьаккха болам ца эшаш, ха яхача нахага могачох хьожаш хиннад вайна юкъе.
Автобусашца дӀа-хьа ухаш, вай зувш да-кх воккхача сага хьалхара зӀамагӀбараш ахча дӀадала гӀерташ хилар.
Либихана ханага кхаьча боккхий нах дукха бац вайна юкъе. КӀоарга хьаькъал долча царга дукха да хьеха, царца дагавала аьттув хилар да доккха гӀулакх. ЧӀоагӀа дог дика хинна, гӀозбаьнна бар из йолчара дӀаболха хьаьший.
