МагIалбика кхален Южнера лоархIаме никъ тоабир
20.11.2024 11:31
МагIалбика кхален Южнера Кокчетавски урам тIа асфальт биллар 850 метр, из никъ лоархIаме бар кхо моттиг шоайла хотташ хиларах: ишкол, берий беш, фельдшерско-акушерски пункт, аьлар «Сердало» газетага МагIалбика кхален администраце зарбан болх лелабераша.
ХIанз цига хьалъеш латтача ишкола балхаш йистедоалаш латт. Кастлуш цо ший дешархой тIаэцаргба. Берий беш а хьалъеш я, хьатIадоагIача шера цига бераш хургда. ФАП хьаеллаш, дIадахача кIира лаьрххIа кхетаче дIайихьар.
«Кокчетавски урам тIа асфальт биллар, из духхьал наькъа хьал тоадар хинна Iац; Южне бахархой вахара хьалаш тоадара, кхерамзлен Iалашо яра боаккхаш бола гIа ба из.
Карарча хана, из моттиг тоадара йола вахара проекташ кхоачашъеш я», - аьлар цигарча Iаьдала болхлоша.
