Пхьилекъонгий-Юртарча вахархочун кхий чура, герз корадир ӏаьдала болхлошта
Илдарха-Гӏалий тӏара полице болхлой, мехкарча МВД кинологаш, «Мак-2026» операци дӏахьош, Пхьилекъонгий-Юртарча вахархочун кхий чу чухьожаш хилар. 58 поатрон, кхо дӏандарг, иштта кхы а хӏамаш корайир царна цу моттигера. «Сердалога» из хоам бера МВД болхлошкара.
«Мехкарча МВД Тохкама-криминалистически оагӏон болхлоша белгалдечох, РГД–П (кӏур беш йола хьийнача хӏаман дӏандарг) я шиъ; танка духьалтувсаш, аьшк , бетон, кирпишк лоалаеш я вож; иштта 5, 45 мм. калибра 58 тӏема юкъе лелаю поатрон я царца.
Цу ковна дас белгалдечох, уж еррига хӏамаш 2000-ча шера дӏакхалхача цун веший хиннай. Бокъо йоацаш цӏагӏа герз леладарах йолча бокъонга гӏолла, гӏулакх хьадийллад ӏаьдала болхлоша. Дӏахо тохкам беш я полици», - дийцар тхога МВД. Полице болхлоша бахархошта хьалхадоаккх, байнача нахах диса герз, цу оагӏонцара хӏамаш цӏагӏа лелаяр бехктокхаме озаш хӏама долга. Цӏагӏа йоадае бокъо йоаца хӏамаш ӏаьдалга дӏачуяларо хила тарлуча бехках кӏалхарбоах нах. Иштта хьавена герз хьачуденначунна баркал аьле, ахча лу тахан МВД.
