Соагӏапча, газа кхерамзле лорайой хьожаш, рейд йир
Гӏалгӏайчен Магӏалбика кхале аргӏанара хьехама рейд йир. Из вӏашагӏъеллар моттигерча администраце газа болхлошца цхьана. Кхетачен керттера маӏан- бахархоша газацара кхерамзле лорайой хьажар, йоагаю газ лоархӏа гӏирсаш миштад хар, цу даькъ тӏа кхоачамбоацараш дий хьажар.
«Рейд дӏахьош гучадаьлар газа гӏирсаш латтача цхьайолча фусамашка кхоачамбоацараш хилар. Къаьстта терко тӏаяхийтар газах декхар дӏадалара, наха хьалхадаьккхар ший ханнахьа коммунальни хьалех бола мах дӏабалар хӏара сага декхар хилар», - аьлар «Сердало» газетага Магӏалбика кхален доал дара даькъ тӏарча администраце.
Тхоца къамаьл даьчо белгалдир, цу тайпара рейдаш каст-каста дӏакхухьаргья, аьнна. Цар новкъостал ду хатар ца хилийтара, газах дола декхар хьадаккхара, наьха фусамашка газ лоаттаяра.
