Эбарга-Юртара Шолжа бердаш меттаоттадир
Гӏалгӏайчен Шолжа кхален Эбарга-Юрта, Шефски урамах, Шолжа хиво ӏояьха берда йистош меттаоттайир. Из болх дӏахьош хилар республикан ӏалама тароний, экологе Министерство, мехка кулгалхочо Келаматанаькъан Махьмуд-Ӏаьлас тӏадилла декхар кхоачашдеш. Бекарга бутт дӏаболалуш, доккхий догӏаш делхарах бердаш хаьрцар. Из хаттар кхоачашде лаьрххӏа йола техника юкъеяьккхар, иштта говзанчий новкъостал а ийшар.
«Шин дийнахьа цу моттиге 385 кубометр топпар, 70 кубометр кхера бера. Говзанчаша берда йистош чӏоагӏъярал совгӏа, хий а цӏендир.
Хий дӏалостадир аьтта бердагахьа, догӏаш ӏодихьачарна ӏоткъам хургбоацаш. Цо таро лу дӏахойодача хана цун тӏалатта низ лаьгӏбе», - аьлар «Сердало» газетага мехка ӏалама Министерстве.
Дӏахо бе беза болх ба цу даькъ тӏа гаьнаш дӏайогӏар. Цу тайпара дикагӏа чӏоагӏъергья берда оагӏув.
