Интернета оагӏонга гӏолла болх дӏабахьа йиш йола моттигаш хьайийллар мехкарча ворхӏ юрта
Шоай цӏагӏа баггӏаше, паччахьалкхен оагӏонцара, ахчанцара болх дӏабахьа йиш йола моттигаш хьайийллай вай мехкарча ворхӏ юрта. Магӏалбика кхалерча Вежарий-Юрта, Махьмад-Хитӏе оалача, Шолжа кхален Даьттагӏе, Оалкама, Чамалха, Берда-Юрта, Жӏайрахьа кхален Гӏулой яхача юрта хьайийллай тахан бахархой хьал дикка аттачахьа дерзадеш йола уж моттигаш. Моттигерча администраце, культран Цӏагӏа хьайийллай кабинеташ.
«43 таьрахьашца дувзаденнарий оагӏонашца бувзам хила йиш йолаш я кийчъяь моттигаш. Эшаш йола сайташ хьакъоастаяь латт компьютераш тӏа, цунга хьежжа интернете гӏолла уж леха ца езаш аттагӏа да бахархошта.
«Юртарча кабинеташка» гӏолла Госуслуги яхача оагӏонцара, МФЦ Цаӏ йолча порталацара, Россе Банкацара, йоалах йолча Федеральни моттигацара, иштта кхыдарашцара болх чакхбаккха аьттув ба тахан бахархой. Шийна болх лаха йиш я цига гӏолла, бизнесмений оагӏув хьаллоацаш моттигаш я, юридически, ахчанцарча балха новкъостал деш ба. Иштта йола моттигаш хьаеллар къаьстта доккха гӏо хулаш да шоай доалахьа компьютер йоацача, мобильни интернет ма хетта ца хулача гаьна ядача юрташкарча бахархошта», - дийцар «Сердалога» мехкарча Паччахьалкхено.
Дӏахойодача хана дикка дӏашербе лерхӏ из болх вай мехка. Республикерча гаьна ядача кхалешкарча наьха хьал аттачахьа даккхара тӏехьа дӏахьош болх ба из. «Юртара кабинеташ» хьаелларо паргӏато ергья бахархошта. Россе Центробанка хьалхале йолаш дӏахьош программа я из. Массехк моттиго шоай бувзам чӏоагӏбаь, цхьана дӏахьош болх ба ала деза цох. Мехкарча Паччахьалкхено геттара къоабалъеш тӏаийцар из проект, хӏаьта болх боаржабар промышленностах, таьрахьашца дувзаденнарех йолча министерствон тӏалатташ ба.
