Гӏалгӏайчен ишколашка терроризмах бейнараш дагалаьцар
Тов бетта 3-ча, терроризмаца къовсам лоаттабара, дийнахьа Гӏалгӏай Республикан дешара моттигашка дагалоаттама кхетаченаш дӏайихьар.
Дешархошта лаьрхӏа классашкара сахьаташ хилар, дагалоаттама урокаш; терроризма, экстремизма духьалъотта везаш хиларца дувзаденна къамаьл дир. Хьехархоша дийцар, берашца сакхетам болаш хила везарах лаьца. Иштта хьалхадаьккхар кхерамзлен бокъонаш лораяр, машар лорабар, юкъарлонца бувзаме хилар лоархӏаме долга.
Къаьстта йола моттиг дӏалоацаш бар террористий карах бейнарех бола дагалоаттам. Доакъашхошта дагадехар 2004 шера тов бетта 1-3 деношка хиннар, из яр мехка исторен эггара унзарагӏа йола оагӏув.
Дешархоша йист ца хулача минотаца дагалаьцар бейнараш, цар дакъа лаьцар бе-бе чулоацам болча боламашка; иштта дийцар терроризм, экстремизм йоаржаяра духьале е езарах; цхьоагӏо йола, барт бола юкъарло машар лорабара тешаме хиларах.
