«Дешар. Кхерамзле» яхача проектах лекцеш дӏайихьар мехкарча ишколашка
«Дешар.Кхерамзле» яхача проектага гӏолла, кхетаченаш хилар, вай мехкарча ишколашка. Цигара хьехархой бар спикераш – «Дешар» яхача российски оагӏон лектораш. Дешархошца цар дийцар зуламхоша доаржадеча воча гӏулакхех лораваларах, моллагӏа тешаме ца хета хӏама теркалдича, ӏаьдала болхлошка ӏалаьмате чехка хоам бе безаш хиларах.
«550 доакъашхо вӏаший гаргавугаш йола кхетаче дӏайихьар мехкарча 11 дешара моттиге. Лекцешка ладувгӏарал совгӏа, дукха хаттараш хилар къонабарий. Интернета оагӏонашка воча гӏулакхех лоравалар мишта хила деза тохкаш хилар уж», - дийцар «Сердалога» мехкарча Паччахьалкхено.
Ерригача Россе «Дешар. Преми» яхача яхьашка котало яьккхача, «Дешар» яхача российски оагӏон лектор йолча Цхьорой Заремас белгалдечох, къонабараш воча гӏулакха юкъе чуозар низаца, кхерамца хулаш дац дукхагӏча даькъе. Зуламхоша шоаш геттара безаболийташ, бокъонца бола доттагӏий болаш санна, говза болх лелабу, къонабараш дӏатешабе гӏерташ.
Спикера теркалдечох, къонача тӏехьенга массахана дӏадувца деза цӏагӏа, дешара моттиге малаш ба ца ховча нахаца интернете бувзаме яла, цар яхар хьаэца, царех теша йиш йоацилга. Зуламхоша моллагӏча тайпара хӏилла, говзал кхостаергья дунен хӏама довза кхенза бола къонабараш шоашта тӏехьабаха, тувлабе хьожаш, цунга хьежжа массахана фийла хила везилга, моллагӏча хӏаман тӏехьа боккхагӏбарашца, хьехархошца дагавоалаш хила везилга, хьалхадаха деза къонабарашта. Тешаме доацар юххьанца довза, цох сакхувш хила ӏомае еза вай къона тӏехье тахан.
