Бувзамашка гӀолла лелаш ба, ГӏалгӀайче алапеш тӀара ахчаш совцадаьд яха харц хоам
Мессенджерашка, вахара хоамашка дика баржаш боагӀа харц хоам, ГӏалгӀайчен Паччахьалкхен соцам болаш санна. Цу тӀа йоах, шоаш «раьза болаш» е низагӀа паччахьалкхен балха болча нахагара 12 % алапи соцадеш хилар - из ахча дӀадала дӀадохьийташ да цхьан фонда е предприятена. ГӏалгӀайчен ЦУРо лаьрххӀа хоам бу, из харц хиларах.
«ГӏалгӀай Республикан Паччахьалкхене соцам арабаьнна а хиннабац, е карарча хана арабала лерхӀаш а бац цхьаккха тайпара паччахьалкхен болхлой алапеш совцадарах. Дӏа-юха даржаш долча каьхата тӀара йоазув, Россе Федераце къахьегама, бюджета закон телхадеш да. Цо цӀаькха а хьагойт из бакъ цахилар», - аьлар «Сердало» газетага мехка урхаллен Центре.
ЦУРе тӀахьийхар республикан бахархой цу тайпара харц хоам бувзамашка гӀолла цалелабара.
ГӏалгӀайчен паччахьалкхен нийса хоам го йиш я цун телеграм-канала сайта тӀа.
