Магас пхье дIадихьача вIашагIкхетаре белгалдир, бахархошка нувхаш Iо ма кхувса аларах а цу кхулакха уж тIахьехарах кхоачам хилац, из масса йолча региона муниципальни даькъ тIа латташ дола, кхоачашданза дисса хаттар да аьнна. Ше къамаьлдеш цу деша терко тIаяхийтар Магас пхье кулгалхочо.

Вахара-коммунальни боахама кулгалхочо белгалдир, нувхашца дувзаденна хаттар чоалхане латташ хилар. Цо яхачох служба болхлошта хьалхашка дукхаза нийсденнад тишденна гIандаш, диванаш, кхыйола вахарера нувхаш Iокхувсаш доккхий гувнаш хул.

Цул совгIа дукхаза бахархоша чукхийсай контейнерашка къаьнара кирпишк, обояш, юха къаьста гIишлон материалаш, дахчаш, иштта дукха кхыйола нувхаш. Из цкъа хинна Iийнадац.

Цу дерригне таро хулийтац лерттIа нувхаш дIаяхара боагIаш бола болх бе. Столица мэра декхар оттадир цу тайпара нийсхо йоацаш дола гIулакх леладераш белгал а баьха, уж дIахо йодача хана административни бехктокхаме оттабе.