Йокъаеннача баьцех цӀераш еттарцара къовсам чӀоагӀбе лерхӀ Шолжа-Шахьаре
Кхорзаенна латтача баьцех цӀераш еттар бахьан долаш, дукха хатараш даьржад мехка. Шолжа-Шахьарерча администраце, МЧС, Ӏаьдала болхлой юкъе болаш, дӀайихьача кхетаче дийцар цу оагӀонцара болх чӀоагӀбарах. ТӀахьожама болх лелабеча Султиганаькъан Урусхана белгалдечох, йокъаеннача йоархӀех цӀераш еттар бахьан долаш 20 совгӀа хатар хиннад укх тӀехьарча хана шахьаре. Духхьал цхьан урам тӀа хиннад ялх хатар.
«Йокъаеннача баьцех цӀераш еттар бокъо толхаярал совгӀа, наьха вахара кхерам тоссаш да. Доагаш латтача деношка йийза цӀи, йоккха юкъ ялалехь; цӀеношта, хьунашта, кхыйолча моттигашта дӀатӀайоал. Цу гӀулакха духьалара болх чӀоагӀбе беза вай, бехкебараш бехктокхаме озаш», - белгалдир Султиганаькъан Урусхана.
Шахьара администраце «Сердалога» дийцачох, хатараш лаьгӀдара тӀехьа доазошта юкъера оасаш аха деза, нувхаши баьцаши йоагаеш лелараш бехктокхаме оза беза боаггӀача боараме, бахархошца цу хьакъехьа къамаьл деш кхетаченаш дӀакхахьа еза.
