Дезалца салаӏа йиш йола парк хьаелларгья Шолжа-Шахьаре
Шолжа-Шахьаре берашца салаӏа йиш йола парк тоаеш дӏабихьача балхага хьежар вай мехкада Келаматанаькъан Махьмуд-ӏаьла. «Сердалога» из хоам бир Мехкадаь зарбан болх лелабераша.
Йоккха, паргӏата хургйола парк хьаелла лерхӏ гурахьа.
«Эшаш мел йола хӏамаш ийцай. Хӏара аттракционага хьожаш болхлой хургба. Санитарни, иштта кхыдолча оагӏонашца дувзаденна мел дараш лорадеш, йоккха терко еш, тӏахьожам лоаттабеш моттиг хургья цох. Тайп-тайпарча ханага кхаьчарашта ловза моттигаш, лазерни, иштта кхыйола аттракционаш, гобоаккхаш лела, хӏама йохкаш йола моттигаш, салаӏа доазош, берашта лаьрхӏа, иштта культуран оагӏонцара кхетаченаш дӏакхахьа къоастаяь моттигаш хургья цига. Кхерамзлен хьал лорадеш, цу оагӏонца дувзаденнарашта йоккха терко еш, дӏахьош ба болх», - белгалдир вай Мехкадас.
Хьалхагӏа из моттиг Мехкадас дӏакъовлийтаяр, цхьацца кхоачамбоацараш бахьан долаш. Карарча хана инвесторашца, шахьара администрацеца из деррига меттадоаладеш къахьегаш ба.
Келаматанаькъан Махьмуд-ӏаьлас доккха баркал аьлар тахан эшаш йола из проект дӏаяхьара тӏехьа къахьегаш волча инвестора.
Шолжа-Шахьарера парк бахархой, иштта хьаьший тӏалатташ, ма хетта салаӏа йиш йолаш моттиг хила еза, деррига кхоачашдаь даьлча.
