Гӏалгӏайчен Шолже СВО доакъашхошта дагалоаттама сийленг-чурт оттадергда
Шолже дӏахьош ба «Дагалоаттама, сийлен» парк тоаеш болх. Кастлуш цига Лаьрххӏача операце доакъашхошта лаьрхӏа дагалоаттама сийленг-чурт оттадергда, яхаш, дийцар «Сердало» газетага администраце.
«Шолжа мэр ӏумаранаькъан Аслан, гӏончаца Беканаькъан Халитаца цхьана, балхаш деча вахар. Проект дӏайолайир карарча шера бекарга бетта. Таханарча денга кхоачаш, болхлой тоабо наькъа такилг тоадеш плитка ӏойиллай. Цул совгӏа, цар баьццардерзаде деза доазув кийчдир: ӏаьржа лаьтта доассадир, 60 гаргга га дӏаегӏар, лампаш ӏо егӏар. Хӏанз лаьрхӏад бӏухой дагалоаттама сийленг-чурт оттаде, иштта цига хургда гӏандаш, кхоаленаш. Наха салаӏара паргӏато хургйолаш мел дар хьадеш латт», - аьлар хоамо.
Тхоца къамаьл даьчо яхачох, проекта чудоагӏаш деррига а тоадаь доазув 4 500 квадратни метр да, царех 800 квадратни метр ӏоакъа ӏотеха да.
