Тӏема аренашка вахар хаьдача бӏухой дезалашта терко лоаттаеш ба Шолжа-Шахьаре
Тӏема аренашка Даьхен хӏама лорадеш латташ вахар хаьдача бӏухой дезалаш болча баха хилар Шолжа-Шахьаре «Даьхен лорабой» яхача ганза филиала болхлой Гӏаппархой Мухьмад-Башир, психолог Местой Хьава. Да, воӏ, цӏен-да дӏаваьнна, халача хьале этта, гӏайгӏо вӏашкабихьарий оагӏув хьаллаца арабаьннабар уж нах.
«Дега безамца тӏаийцар уж цига. Психолог йолча Местой Хьавас берашца, бӏухой ноаношца, исташца къамаьл дир; шийна могачох цар дог теде хьожаш. Тахан халача хьале эттача цу наха чӏоагӏа эш оагӏув хьаллацар, гӏо дар. Гӏаппархой Мухьмад-Башира, цар вахарера кхоачамбоацараш тохкаш, таханарча дийнахьа эггара чӏоагӏагӏа эшар, дезар фуд хоатташ, болх дӏабихьар царца.
Ӏаьдалгара хьадоагӏаш долча хӏаманца, иштта кхыдарашца дувзаденнараш даьшхар цар, санаторе баха дегӏа могашал меттаоттаяр, салаӏар дика хургда, аьнна, хьалхадаьккхар. Къаьстта бераш чӏоагӏа раьза дар хьаьшашта, шоашта филиалагара мерза совгӏаташ дена», - йоах «Сердалога» «Даьхен лорабой» яхача ганза зарбан болх лелаберашкара кхаьчача хоамо.
Тӏема аренашкара цӏа ца боагӏаш бисарий дезалашка хьажар, массахана царца бувзаме долаш вахарера кхоачамбоацараш юстардахар эггара лоархӏамеча декхарах да тахан. Воӏ, да, цӏен-да дӏаваьнна бисарай геттара чӏоагӏа оагӏув хьаллаца беза ха я ер, хӏана аьлча ше дагавоаллилга, новкъостал де кийча болга, шийца из гӏайгӏа екъилга хоалуш хилча; моллагӏа хало такха аттагӏа хул.
