Берашта цхьацца хӀама Ӏомадеш, хилар Шолжа-Шахьарера МЧС
02.07.2025 14:48
Бераш хих лоралургдолаш, царца белггалара болх дӀакхухьаш ба Шолжерча МЧС викалаш. Цу тайпара цхьа кхетаче хилар Дзовранаькъан БейӀаьлий цӀерах йолча ишколан бассейне. МЧС зарбан болх лелабераша белгалдечох, цигарча лагере салоӀаш долча берашца кхетаче дӀахьош хиннараш бар «Аьрзи» ПСО болхлой.
«Хин моттигашка мишта лела веза, лораде дезараш малагӀаш да хьалхадоаккх оаха берашта, салоӀамах бала хургбоацаш. Хатар ийккха моттиг хуле, эггара хьалха де дезар фуд, гӀо эшачунга хьажар мишта хила деза дувц берашка. Иштта царна довзийт, хин юхе увттаяьча гӀармаша фу белгалду», - дийцар «Сердалога» Россе МЧС ГУ мехкарча хин моттигашкарча кхерамзлен хьалах болча оагӀон кулгалхо волча Темарханаькъан Адама.
