Шолжа кхален администраце бахархошта, мах боацаш, юридически оагӏонцара гӏо дергда
Мехкарча Паччахьалкхен юридически бюро болхлой Шолжа кхален администраце, укх бетта 19-ча дийнахьа гӏо деш хургба цигарча бахархошта. ӏаьдалгара цхьацца хӏама хьадоагӏачар, мах боацаш, шоай хаттараш тахка аьттув хургба цу дийнахьа.
«Сердалога» баьча хоамах, юристашца дагабовла йиш я наьха, нагахьа бокъо йоацаш пенси, пособи соцадаь, СВО доакъашхошта, дукха бераш дарашта терко еш беце. ЖКХ оагӏонца хьадийтта латта доккхий декхараш бух болаш дий хьажа, бойлахьа дисача берашта йоагӏаш йола квартира хьаялийта, иштта кхыдараш меттадоаладе аьттув ба бахархой цу оагӏонга гӏолла.
Юристашта тӏаваха йиш я лаьттан доазонцара хӏама къоастадеш, хьайна хьакхаьчача хӏаман доал оттарца, алименташ хьадахарца, барайтта шерга кхачанза барий бокъонаш меттаоттаярца халонаш нийсъеннаяле.
Болх беча моттиге алапи ханнахьа хьалуш беце, цхьаккха бокъо йоацаш, доацача бахьанах балхара дӏаваьккхавале, хьай бокъонаш меттаоттае йиш хургья хьа юристашка гӏолла.
