Яндекс Лицея дешархой проекташ тӏаэцаш хилар Магасерча технопарке
Яндекс Лицея дешархой «Промышленни программировани» яхача оагӏонцарча проекташцара болх дӏахьош хилар тахан «Кванториум» технопарке. Из хоам «Сердалога» бир цу моттигера.
«Лекцешка ӏомадаьр балхага гӏолла дӏагойта дезаш бар дешархой шоаш хьакхелла Python меттацара ӏT - проекташ йоаржаеш. Баркинхой Раянас Flask, SQLAlchemy, Flask-Logӏn гӏолла интерактивни оалача балха, иштта кхыболча оагӏонцарча тохкама балха эшаш бола Веб- оагӏув вӏашагӏабеллаб. Цун проекто чулоац психологически тесташца, берригача балха истори гойташ йола «доалахьара кабинет». Хазанаькъан Аминас тоабан, декхарашта доал дергдола кӏийле хьакхеллай гӏолла. Проекташцарча балхацара декхараш, тоабан чат, де дезараш дӏа-хьа декъар чулоацаш я из платформа», - йоах тхога бенача хоамо.
Ӏарчакханаькъан Ислама Flask, Flask, SQLAlchemy, Jӏnja2 гӏолла дерригача дунен тӏа отелеш лохаш бола веб-оагӏув хьакхеллаб. Цу проектага гӏолла дукха ха ца йоаеш моллагӏча моттигера хьайна ха яккха отель хьалаха йиш я хьа. Хазанаькъан Дене FastAPӏ, PostgreSQL гӏолла ахчанцара болх дӏакхахьа эшаш бола керда оагӏув хьакхеллаб. Дӏадодар, хьатӏадоагӏар, иштта бетта хинна болх хьагойташ бола дика оагӏув ба из.
