Бизнесацарча балха хетаяь кхетаче дӏайихьар мехкарча УФАСе

«Кхетаче хьаеллаш, УФАСа хьалха латтача Тоачанаькъан Батыра белгалдир цу оагӏонцарча балхаца дувзаденна дола керттердараш. Къаьстта терко еш дийцар цо эггара кастагӏа нийслуш долча кхоачамбоацарех, уж хургдоацаш де дезарех. Вай мехка зӏамига, йоккха бизнес дӏахьочар балхаца эггара дукхагӏа нийслуш долча гӏалатех дувцаш вар кхетаче бизнесмений бокъонаш лораеш вола викал Дзовранаькъан Заьлмаха, «РОССЕ КОГГӏОРТОЛГА» яхача моттигерча даькъа хьалха латта ӏарпенаькъан Аят, къонача бизнесмений Ассоциаце гӏалгӏай оагӏон хьалха латта Пхьарчанаькъан Мухьмад-ӏаьла.

Иштта йола кхетаченаш каст-каста дӏакхахьа чӏоагӏо йир гулбеннача хьакимаша, хӏана аьлча берригаш цхьана гулбенна дӏахьоча вӏашагӏкхетаре кхоачамбоацараш дикагӏа гучадоал, де дезачун йист яккха а аттагӏа да», - дийцар тхога вай мехкарча УФАСа болхлоша.

Паччахьалкхен моттигашта, шоай доалахьара хӏама хьадечарна юкъе бувзам хилийтара тӏехьа, бизнесмений шоай балхацара кхетам лакхбара, цхьацца дола хӏамаш царна кӏоаргагӏа, дикагӏа довзийтара тӏехьа дӏахьош болх бар из.