ГӀР УПЧ мехка яхархочун пенси хьаэцара бокъонаш меттаоттайир
ГӏалгӀайчен сага бокъонех волча викалга лоткъам бир дукхача дезала нанас, из я диъ бера нана, царех цаӀ заӀапхо да. 2025 шера аьтинга бетта цо дехар дӀачуделар пенси хьадоладе ше ха яьнна хиларга хьежжа, бакъда цун хаттара духьала дукхача хана денз жоп деннадац. Из хьадоагӀаш цахилар Ӏаткъаш да дезала вахара, хӀана аьлча цунна юкъе цхьа бер заӀапхо а хилча пенси дика накъадоалаш дар дукхача дезала нанна.
«Сага бокъонех волча викала Россе Вахара ганзе каьхат дӀадахьийтар из дош тахка. Тӏахьожама болх дӀабихьачул тӀехьагӀа ховш хилар, из хьацадоладалара бахьан СФРага лорий-социальни экспертиза чӀоагӀбеш бола бер заӀапхо хилара хоам цахилар долга.
Из иштта хилар чӀоагӀдаьчул тӀехьагӀа, цу кхалсага пенси хьадоладелар», - аьлар «Сердало» газетага ГӀР УПЧ аналитически хоамий даькъ тӀа. Пенси хьадоладир, 2025 шера аьтинга бетта 5-ча дийнахьа денз.
Хӏара бетта цо хьаэцаргда 18 119 сом. Цул совгӀа, Вахара ганзо пенси хьаделар из соцадаь лаьттача хана денз, из да дӀадахача шера аьтинга бетта денз карарча шера наджгоанцхой беттага кхаччалца. Ахча, цу кхалсага банка чота тӀа хьатӏадайтад.
