ГӏР УПЧ набахта воаллача сага, цун дезала бокъонаш лорайир
Гӏалгӏайчен сага бокъонех волча викала аппарате дехар чуделар Наьсаре яхача цхьан кхалсага, ший лаьца воалла воӏ, цӏен гарга хургволаш, новкъостал дехаш. Из саг лаьца воалл Москверча цхьан тохкама ханна йолча набахта. Цу кхалсага яхачох, цун дезал геттара халача хьале ба. Ахчан таро цахилар бахьан долаш, иштта лаьца воалла моттиг гаьна хиларах, гаргарча наьха таро яц цун тӏехьааха.
«Лаьца воаллача сага, цун дезала бокъонаш лораяра, сага бокъонех волча викала цу гӏулакха тӏехьа къахьегаш, каьхаташ дӏадахьийтар Ставропольски крае гӏолла йолча Россе ФСИН. Шоайла дагабаьнна, ӏаьдала болхлоша болх дӏабахьаро таро елар, Ставропольски крае гӏолла йолча тоавалара урхаллене из ха яккха, ше вахача моттига гаргагӏа хургволаш», - аьлар «Сердало» газетага ГӏР УПЧ хоамий-аналитически даькъ тӏа.
Белгалду, Россе законо дӏадехачох, лаьца боахка нах бокъо йолаш ба моттигерча набахте ха яккха, шоай дезалашца бувзам хургболаш.
