Догӏаш дукха делхарах, лоаман моттигашкара хьал даим кийча хила везаш да
19.05.2026 22:42
Жӏайрахьа кхален хин моттигашта лакха терко лоаттаеш ба, мехка дӏаьхденна догӏаш латтарах, лоа дашарах. МЧС болхлой, юрташкарча администрацей кулгалхой 24 сахьата тӏахьожам беш ба цига.
Къаьстта лакха терко еш ба Жӏайрахьарча, Олга тӏарча, Тамарианерча моттигашта. Хӏара ах сахьат массаза доал, хин айдалара боарам бусташ ба цига. Таханара хьал кхерам болаш дац ала йиш я.
«Вӏовнашки» яхача гӏалай моттига тӏабода никъ хьийдда доагӏача хиво бохабаьб берда йист ӏохьош. Болх дӏахьош боахк цига. Кхоана ӏуйрийна, дӏа-хьа ваха йиш хургйолаш, никъ тоабе болалургба. Никъ тоабарал совгӏа, тӏехьа тӏайоагӏача хана цу тайпара хатар хургдоацаш, берда йистош чӏоагӏъеш болх дӏабахьа лерхӏ цига.
