ГӏалгӀайчен Гойтама галерее, «Рамадана хетадаь сурт» яха говзанча хьехам дӀабихьар
ГӏалгӀайчен гойтама галерее дӀайихьар цӀайна хьалхара йӀайха кхетаче. Шолжерча №1 йолча ишкола дешархой гулбелар, «Рамадана хетадаь сурт» яха говзанча хьехам дӀабахьа. Из кхетаче хетаяь яр хьатӀадоагӀача Мархашта. Новразанаькъан Марета кулгал деш, берашта яйзар тайп-тайпара каьхатах хьадеча гӀирсий къайле. Из чӀоагӀа сатем безаш болх бар, из тара бар Рамадан бетта, цун сабарга диллача.
«Говзанча хьехам дӏаболабелча денз, берий терко тӀаэзар балха технико. Марета кулгал деш, дешархошта дайзар каьхатаца балхаш дара хьал. Берашта безабелар из болх, уж даим хетташ бар каьхат малагӀа хила деза, цох фу оал, цу юкъейоахаш йола материалаш малагӀаш я, яхаш. Уж лаьрхӀа бар цӀагӀа а цу тайпара болх дӀабахьа», - аьлар «Сердало» газетага ГӏалгӀайчен Паччахьалкхен галерее.
Говзанча хьехам чакхбоалаш, бокъонца дола кхоллама балха дакъа гуш хилар. Бераша гӀаддахарца шоайла гойтар сурташ - шоашта фу хов хьажа гӀерташ шоаш даь балхаш.
Бераша шоай новкъосташа даьча балхашта мах оттабир. Цу тайпара шоайла къамаьл хиларо таро елар хӀара бера ший къахьегам фу мах болаш да кхетаде.
