Гӏалгӏайчен СВО ветерана фусаме «Хьаькъале цӏа» яха гӏирс оттабергба
«Даьхен лорабой» ганза Гӏалгӏайчен филиала болхлой хьежар Наьсаре вахача СВО ветерана Налганаькъан Мухьаммада цӏагӏара хьалаш миштад. Ганз хьожаш я заӏапхой болча ветераний фусамашка ма хулла дикагӏа вахара хьалаш хилийта. Цу программанна чудоагӏаш, вахара дешашца бувзабенна болх лелабеш йола Беканаькъан Мадина яхар, шахьара администраце говзанчашца, Даьхен бӏухо волча, из вахача фусаме цунна эшаш дола технически хьалаш хьакхолла.
«Налганаькъан Руслана Мухьаммад хьалхарчарца вахар СВО, цо денал гойташ кхоачашдир ший тӏема декхар. Бакъда тӏема мугӏаре латташ цун йоккха чов йир. Цигара цӏавеначул тӏехьагӏа Мухьаммад клинически центрашка меттаоттара дарба деш хилар. Тахан а могашал тоае езаш ва. Комиссе кхелахоша мах оттабир цун цӏагӏа де дезачун. Говзанчаша бустамаш даьхар наӏарий санагӏаш нийса хургдолаш, уж иштта хьежар вахаре цӏена лелае езача моттигашка, цар белгалдир архитектурни новкъарлонаш юстаръяхара де дезар», - аьлар «Сердало» газетага «Даьхен лорабой» ганзе.
Уж цига бахара керттера маӏан да, лаьрххӏа йола проект хьакхоллар. Цун цӏагӏара вахара хьалаш хувцара йола план кийчъергья цар. Ветерана цӏагӏа санагӏаш дӏадоахаргда, цӏенонна аравода моттиг заӏапхочун еззача беса хьаергья. Цул совгӏа, фусаме «Хьаькъале цӏа» яха гӏирс хургба оазаца болх беш.
