Йоккхача Коталон хетаяь яхь дӏайихьар Заьзгакъонгий-Юрта
Коталон цӏай маьтсела бетта 9-гӏа ди хьатӏакхоачаш, Заьзгакъонгий-Юртарча ФОКе Магӏалбика кхален моттигашкара спортсменаш гулбелар. Сийлахь-боккхача Даьймехка тӏема Коталонна хетаяь дзюдох йола турнир дӏайихьар цига. Моттигера спорткомитет яр уж яхьаш дӏахьош хиннар. Деррига хӏама боаггӏача боараме кийчдаь долаш, дӏайихьар яхьаш.
«Кхален тайп-тайпарча клубашкара, секцешкара 120 спортсмен вар ФОКе венар. Боккхача тӏема Коталон, вай лаьтташкара фашиста лар хоадаеш лаьттарашта хетаяь яр уж яхьаш», - дийцар тхога Магӏалбика кхален администраце. Гуш дар, яхьий доакъашхой дикка кийчо яь болга.
Хӏаравар коталонга кхача гӏерташ вар цу дийнахьа. Заьзгакъонгий-Юрта хиннача яхьаша хьагойтар, бирсача тӏема шерашка моастагӏа вохавеш лаьттараш мемориалашка, книжкашка, кхыйолча моттигашка дагалоацаш санна, кхувш латтача къонача тӏехьен толамашка а бахилга.
Котбаьннараш грамоташца, майдилгашца белгалбир цига. Берригаш раьза болаш, дӏаяхар яхьаш.
